لحد إمتى هفضل ساكت
لحد إمتى هفضل مستحمل ومتحامل على نفسى
ليه خلاص ما حدش حاسس بيا
ولاحد عاوز يعرف اللى جَرَالِى
أو يحس باللى جَارِيلِى
أو يشاركنى بمشورته ودعواته فى اللى بِيجْرَالى
حاسس إنى بموت ببطئ
من كتر ما أنا ساكت
طب ليه ساكت ؟
ليه ما بتتكلمش زي غيرك؟
وذنب غيرك إيه إنك ساكت؟
الجواب : لأن ما كانش ينفع أتكلم
علشان
ما أهزش حد معايا
أو أزعزع إستقراره
أو أضيع فرحته
أو أزود بلوته
أو أبقى عبء عليه فى وقت المسؤليات عليه بقت زايدة
ودايرة معارفه بقت واسعة
وبالتالى أرهقه
وكنت بقول لنفسى إن مش ذنب غيرى إن دايرتى مش كاملة ومافيهاش ناس مصفوفة
فَكنت بَفَضَّلْ إنى أسكت
وآجى على نفسى وأكتم
علشان ما أحملش حد فوق طاقته
أو أكون سبب فى إن حد بيحبنى يتألم علشانى
فوالله ما كنت برضهاله
ولا كان بيهون عليا حد
بس اللى كان نفسى فيه
انهم يحسوا بوقت ألمى من غير ما اتكلم
آه هم معترفين بأن ليا حق فى الآه
بس ليه مستتقلين بشئ من الجفاء يسمعوها منى
؟؟؟
لما كانوا بيسألونى عن حالى
كنت ببتسم ابتسامة موناليزا
من فين تبص عليها
تلاقيها
تبصللك
مهما الناس كتروا حواليها
فكل ما الناس تيجى تكلمنى وتبص عليا
وعينهم تيجى فى عنيا
هيلاقونى باصص بعين راضية
شاكرة
حامدة
بتقول الحمد لله , كله تمام
وهم اتعودوا منى على كدا
...(اللهم لا إعتراض)...
الحمد لله طبعا على كل شئ
بس دى مش بتبقى الحقيقة
باجى على نفسى
وبخبى
وبدارى
واقول معلش استحمل
ويمكن دا اللى طمنهم إنهم مهما بعدوا هيلاقونى بكل هدوء بقابلهم
لأنهم اتعودوا على كدا
ويمكن برضه دا ادالهم الحق فى إن ما يكونش عندهم إستعداد يسمعوا غير كدا
يمكن؟
ووالله عاذرهم ومش زعلان أبدا منهم لأنى شايف إن دا من حقهم
بس أنا بشر
ولأنى بشر ألمنى ووجعنى وجرحنى
إنى لما حاولت أتنفس زى غيرى
وابدأ زى غيرى
لاقيت منهم اللى مش مصدق
ومنهم اللى مش عاوز يصدق
ومنهم اللى مش متوقع ولا متخيل ولا جاى على باله إنه ممكن في يوم أشتكى
ومنهم اللى مش مقدر إنى بحس
ومنهم اللى مش حاسس قد إيه فعلا أنا بنهار
ومنهم اللى بيتفضل عليا بمجرد معرفته بيا
ومنهم اللى حاسس بيا بس واقف عاجز
ومنهم اللى مقدر اللى فيا بس مستنى عليا شوية
ومنهم ومنهم ومنهم
ليه ما بستحملش على غيرى الهوا
ومهما بعد
مش بكابر
وبصوتى ببادر
وأقول يمكن محتاجنى جنبه
يمكن محتاج يطمئن إن وقت ما يعود هيلاقى اللى واقف معاه حتى لو هو بعيد
ليه ألاقى منهم اللى معتبر دا ضعف
ومنهم اللى بيحسسنى إن كدا عبء
ومنهم اللى بيحسسنى ويتعمد يوضحلى إنه بيجاملنى
ومنهم اللى بيتحجج بينه وبين نفسه بحجج
ويجى معايا يبرهنها ببراهين هو شايف إنها على أسس علمية
مع إنها كلام نظرى
والواقع غير الكلام
ولو حتى الكلام صح
فلكل مقام مقال
ومش أى حد يسرى عليه نفس الكلام
كل واحد وله مدخله ومفتاحه
يبقى ليه نعمم طريقة علاج
وناخدها قفش ونقول هو كدا
ومنهم اللى عاوزنى زى ما أنا
وعلشان ما حدش يفهمنى غلط
ما أقصدش زى ما انا انى أفضل ما أتقدمش
لا
أقصد زى ما أنا
تعليقاتى تبقى دايما نفس التعليقات اللى تعود غيرى يسمعها
وردود افعالى هى نفس ردود الافعال اللى تعود غيرى يشوفها
شايفنّى بمنظور مش عاوزين يغيروه
منظور محدود
يستغربوا لو خرجت عنه أو حدت عنه
ويحسوا أنهم اكتشفوا حاجات جديدة فيا
وشخصية غريبة كانت مستخبية
وبنظرة ريبة يستنكروا دا منى
سبحان الله
!!!
رغم إن غيرى كان زيى
وحيد فى البحر زيى
وسبحان الله
هنا اتقابلنا
هنا اتجمعنا
أيوة ايوة
والله هنا
تحت المية
وبدون تردد
حضنا بعض بأخوية
وشَبِّكْنَا إيدينا التشبيكة اللى هي
ظاهرها شديدة قوية عفية
لكن باطنها كان كله حنية
وبفرحة بصينا لبعض
وبلهفة بصينا لفوق
وكان القرار
نطلع نتنفس هوا الحرية
ولما طلعنا
من البداية
حلمنا بمركبنا
مركب بمجدفين وشراع
ومجاديفها
مجداف كان من أمانة
ومجداف كان من إخلاص
وشراعها
كانت شريعته الإلتزام
ومشينا وجدفنا وقاومنا الموج والريح ووقفنا ؟؟؟
آه وقفنا
أصل جت محطة وقفونى عندها
قالوا لى معلش مؤقتا
وشاورولى
ورضيوا بيها محطة أقف فيها
وزى ما قولت مؤقتاَ
وسابونى ووعدونى
هيشحنوا نفسهم وهيرجعوا من تانى ياخدونى
ووسط المية سابونى
وأنا رضيت
ومن قلبى دعيت
ربنا يوفقكم ويكرمكم ويبارك طريقكم
ويهديكم ويحميكم ويثبت خطاويكم
ولما سألونى
قولت وغنيت
طول ما أنتم بخير أنا بخير
أنا مطمن عليكم
أنا شايفكم يوم ورا التانى بتكبروا
وبشوف روحى فيكم
وفى وسط الغينوة بوسط المية بكيت
وبكيت
وبكيت
وقولت هم يا ترى نسيونى ؟
وللا هيرجعوا من تانى ياخدونى ؟
يا ترى هيشدونى معاهم زى ما وعدونى ؟
خايف من كتر ما اتعودوا يبعدوا يجافونى
ولما يحبوا لهم يرجعونى
جوا قلوبهم يدوروا فمايلاقونى
يا ترى ساعتها هيلوموا نفسهم وللا من سكاتى عشانهم هيلومونى؟؟؟أنا عارف إنهم جايين
وإنهم راجعين
لأنى عارف إنهم فى حبهم وأخوتهم ليا جادين
بس هم بجد ما بقوش عارفين
إنى فى وسط المية ما بقتش عارف أجدف لوحدى
الموج غَلَبْنِى
والريح غَلِّبِتْنِى
والمجاديف بتعاندنى
والسمك اللى جوا المية مش بيساعدنى
لا دا أكل مجاديفى وفرم درعاتى ومش راحمنى
يا آآآآآآآآآآآآآآآآآآآآآآآآآآآآآآآآآآآآآه يا درعاتى
مش عارف أمشى بالمركب لوحدى
مش عارف أعوم وسط المية لوحدى
ما بقتش عارف زى ما بيقولوا
ألملم روحى وأداوى جروحى
ياااااانا يا وجوعى
يا آآآآآآآآآآآآه بتفرتك ضلوعى
يا خيبة أمل فى نفسى بتوقع دروعى
يا ترى نسيوا إنى بشر زيى زيهم
ضعيف
عاجز
وحيد
بجوع وبعطش زيهم
محتاج لسلام
محتاج لمكان
محتاج لحنان
محتاج لأمان
زى اللى بيضمهم
دلوقتى بقى لازم يعرفوا
إنى صبرت وصابرت وبصابر وهصابر
علشان خاطرهم
وعلشان ما أعطلش مسيرتهم
لأنى والله فى الله بحبهم
والله فى الله بحبهم
والله فى الله بحبهم
وآدينى هفضل مستنى
فاكر عهودكم وانتوا جنبى
سوا سوا
فى المشوار سوا
فى البحر سوا
فى البر سوا
على الحلوة سوا
وعلى المرة سوا
يااااااااااااااااااااااه
كل دا كنت شايله فى قلبى وساكت وراضى
**********
دا حديث نفسى اللى صعبانة عليها نفسى
فيارب الكل يعرف دا كويس
ويارب ما حدش من ظنه بيا يخيبنى
وحلفتكم بالله
ما حدش يزعل منى
لأنى والله مش زعلان من حد
ولا بعاتب حد
ولا بتنصل من مسؤليتى عن حد
أنا بس بقول إنى من السكون تعبت
فاعذروا ضعفى
لو أنا مش قادر أفضل أنا زى ما اتعودتم
بس دا بجد إن شاء الله لفترة وهتعدى
من أول كلمة حلوة
ومن أول دعوة خالصة
من أول بسمة صافية
تجدد أملى
وترجعلى عهدى بيكم اللى عهدته منكم
فبجد أنا آسف
لأنى مش قادر أكتم أكتر من كدا
لأنى ما عدتش حتى قادر على أنى أكمل
أكمل مشوار حياتى
عاجز
موجوع
مجروح
راجع من تانى وحدانى
ودا صار حالى
أرجوكم شوفوه
طفلى من جوا بيغرق
والسمك حواليه مش بيعتق
وخايف نفسى اللى صعبانة عليها نفسى
هى كمان تفوتنى
ومن فوق تهوى
وتقوللى كمل أنت وتسيبنى
وما يتبقالى منها غير بقايا يادوب أحط فيها رجلى
ما أنا أصل درعاتى
............
!
:'(
.jpg){kind=small}
8 comments:
ياااااااااه
إيه ده كله . مل ده شايلة جواك وكاتم ... ليه كده .. منتا عارف اني مستعد أسمعلك في اي وقت ياراجل
وبعدين أنت كنت لازم تتكلم من زماااااااااااااااان
انا مش هعاتبك لكن هشجعك وأقولك ان ديه بداية الحرية وطريق الخروج من العبودية
أمسك ايدك في إيدايا
نروح سوى أرض الحرية
كل اللي فيها كانوا زايي وزيك .. مشتقين يشوفوا الحرية
انا بدعوك لعالم ممكن تحس فيه ببعص الحرية
هبعتلك الرابط في رسالة ... هبعتهالك على موبايلك
انا مبسوط انك اخيراً اتكلمت وخرجت اللي ججواك بجد مبسوط
زمان انت كنت بتحاول تساعد اللي حواليك بأي طريقة .. بس جيه الوقت اللي تطلب فيه ان حد يسمعك ويمد أيديه ويساعدك
عايز اقولك ان مافيش حد مش محتاج مساعدة .. انا محتاجك وانت محتاجني وانا وانت عايزين حد تاني يساعدنا
وهكذا
لك كل الحب والاحترام
لؤلؤ
لؤلؤ
لك من كل التقدير لك وكلامك الأثمن من اللآلئ
مش عارف يا لؤلؤ ليه أنا خايف
خايف بجد حد يزعل منى لما يقرا البوست
دا
وعلشان كدا بأكد
إنى كلامى مش عاوز حد ياخده على بمحمل شخصى
أو ياخده على إنى بوجه لوم أو عتاب لحد
إذا كان فيه لوم وعتاب وزعل
فهو من نفسى اللى تعبانة حاليا
ومش عارفة تدى زى زمان
وحاسس انها بدأت تعك الدنيا وتزعل ناس كتيرة منها
بس بجد أنا نفسى يعرفوا إنى فعلا تعبان قوى
وبتألم قوى
فعاوزهم يعذرونى لو شافونى متغير
ومش عاوزهم يستنكروا منى التغيير
ويقبلوه
لأنى زي ما قولت بشر
تعرف يا لؤلؤ
أنا خايف أخيب ظنهم فيا
علشان كدا كنت ساكت
بس بجد بحاول أوصللهم إنى فعلا تعبان ومحتاج مساندتهم
بس ما عرفتش لأنى للاسف مش بعرف أتكلم
فكانت أول مرة مرة أطلع فيها اللى جوايا بالبوست دا
فأرجو بجد من تانى إن ما حدش ياخدكلامى بمحمل شخصى
لأنى بحبكم كلكم وما أقدرش على إن حد يزعل منى
تعرف كمان يا لؤلؤ
مش هاين عليا حد يتعذب معايا
بدل ما أكون أنا اللى بخفف عنه
وأشي همه
فهل أنا صح وللا غلط؟
وهل غيرى هيتقبل دا منى؟
ربنا يكرمك يا لؤلؤ
تعرف والله بالكلمة برتاح
وبرضى
وبسعد
مش أكتر من كدا
وخاصة لما بيكون من شخص عزيز
السلام عليك ورحمة الله وبركاته
:)
من حقك تطلب المساعدة
من حقك تقول إنك محتاج
من حقك حد يسمعك
من حقك تتكلم وتقول أنااااااااا متألم
إنت بتساعد ولازم تتساعد ده الدور الحقيقى الكامل
يمكن صعوبة قبول بعض الأصدقاء لشكوتك
راجع إنهم مستغربيين
إتعودوا منك إنك إنت ديما بتساعد وكأن ده دورك الوحيد فى الحياة
إتعودا إنت اللى تسمع
و قعت فى نفس الموقف
كان غريب على صديق ليه إنى بصرخ وبطلب المساعدة وبقوله جه الوقت اللى تسمعنى فيه
فى الأول إستغرب وكأنى شاف إنى بالعب دور غريب عليه
بس ده كان دورى الصح
التغيير مش بيبقى سهل على نفسك بس ده كمان ما بيبقاش سهل للحواليك
يسعدنى إنى أقدملك إيد المساعدة زى ما أنا محتاج برده منك إنك تقدملى إيدك عشان تساعدنى
:)
مجاهد
ربنا يكرمك يارب
كلامك طمنى
إنى مش غلط
أكتر شئ كان معذبنى
إن صعب عليا إن أخيب ظن الناس بيا
بس والله نفسى تعب من كتر الجرى
مش بشتكى أو بقول إنى مش مستعد أسمع حد
بالعكس والله
أنا لما بسمع حد وبشاركه برايى انا نفسى برتاح
لكن
أنا فعلا مش عارف ليه بمر بوقت عصيب
ما كنتش متخيل إنى ممكن أوصل له
بس سبحان الله
دوام الحال من المحال
يسعدنى ويشرفنى مساندتك
وربنا ياااااااااااااارب يجازيك كل خير
وبجد بجد بجد
لو فعلا عاوز تساعدنى فى الوقت الحالى
ما تنسانى من صالح دعاءك
وربنا يارب يكون فى عونك زى ما أنت فى عون عباده
أخوك
M
يا ربي بوست اكتر من رائع كلام كتير من البوست كأن لساني هو اللي بيتكلم بجد بوست رائع وانا مضايق اني مقرتهوش قبل كده .تحياتي
شاكر لك يا محمود
وبجد ادعيلى
:'(
مدونة تستحق المتابعة
لكم يشرفني ان نكون اصدقاء
ادعوك لزيارة مدونتي
لقراءة موضوع:
انحطاط اللغة العربية وفساد الذوق موضوع في غاية الأهمية يتطرق الي انحطاط اللغة في الاغاني كما حصل مؤخرا في البوم ابو الليف http://badr4all.blogspot.com/
:)
السلام عليكم
بارك الله فيك يا أستاذ محمد
بجد مرورك اسعدنى وأدخل السرور على قلبى
طبعا دا شرف لي أن نكون إخوات مش بس أصدقاء
:)
دعواتك :)
Post a Comment